…I dere wunderschöne Bärgwäut, bi ig ganz e andre Mönsch…
Jo dä Stropheahang vom Lied «chumm mit mer» het üs s’ganze Wucheänd vom
19. u 20. Ougschgte 2017 begleitet.
Jedes Johr fingt bim Alpstubli ufem Stoos dr traditionell Naturprodukte Märit statt.
Dr Xaver Schuler, Bsitzer vom Alpstubli, het üs Bärgbrünneler bereits voremene Johr ahgfrogt, ob mir bereit wäri, es ganzes Wucheänd zu ihm i Kt.Schwyz z’cho u dä Märit näbscht Auphorn u Örgelimusig mit üsne Stimme z’umrahme.
Mir hei denn natürli nid lang müesse überlege u hei dä Usflug grad aus üsi Jodlerreis wohrgnoh.
Dr Xaver het gfrot ob mir nid es Schwyzerörgeliquartett wüssi wo bereit wär a dene zwe Täg würd mitwürke. Klar wüsse mir das, zu üs ghöre schliesslech s’SQ Lehmann u so hei sie prompt zuegseit u si mit üs ufe Stoos greiset.
Im Gepäck hei mir feini Sache wie Würscht, Späck, Schlüüferli, Brätzeli, Brot, Züpfe, Mirabelle u Bohne aues us dr Region Choppige gha. Mir hei üsi Region amene Märitstang dörfe vorsteue u Produkt vo do chönne verchoufe.
Chum ufem Stoos ahcho, si mir ufe Fronalpstock gsässelet, wüu mir ou dert üsi Tön hei dörfe id’Bärgwäut wytergäh. Glychzytig isch dr Märit im Gang gsi u flissegi Häng vo üsne Partnerinne u Partner hei de Gescht d’Choppiger Choscht nöcher brocht.
Gägä Obe si mir mitem Sässeli oder z’Fuess wieder Bärgab gange. Natürli het s’Schümli Pflümli ungerwägs nid dörfe fähle u ou dr Kurt hei mir no chönne bsueche.
Nachem Ässä isches bis wyt id Nacht wytergange mit Singe, Auphorn- u Schwyzerörgelitön u mir hei e luschtige u überus zfridnige Obe verbrocht.
Am Morge si mir i das wunderschöne Chiuchli goh Singe u hei ou dusse e Jutz de Bärge zuegrüeft, was sehr e ergrifende Momänt isch gsi, schliesslech hei mir nid immer so e unbeschriblechschöni Kulisse bim Singe.
Ou dr Sunnti hei mir gmüetlech gha, sträng bim Singe zwar, aber wunderbars Wätter, gueti Gaschtfründschaft u ou d’Märitbsuecher hei üsi Sache gluschtet u tou ykouft bises am vieri ziemli nüt meh het gha.
De hets bereits wieder gheisse zum Abschiednäh vo däm schöne Wucheänd ufem Stoos. Jo, zfride, luschtig u wunderbar gmüetlech isches gsi do obe.
Es riesigs DANKESCHÖN geit a Xaver Schueler für die überus grosszügegi u zfridnegi Gaschtfründschaft, mir hei das sehr gschätzt u si gärn is Aupstublicho. Es grosses DANKESCHÖN ou a üsi Partnerinne u Partner, wo für üs dr Märitstang betröit hei.
Das Wucheänd isch verby, aber mir si bestimmt nid s’letschtmou uf däm schöne Fläckli Ärde gsi.
…i ha e Wunsch näbscht gueter Gsundheit, dass no mängsmou mit mer chunnsch…