Am 27./28. Mai 2017 isches sowyt gsi. Nach 12 OK-Sitzige, angerhaub Johr Vorbereitigszyt u unzählige Besprächige vor u nach dr Prob, hei mir es unvergässlechs Jubiläum u Jodlerträffe dörfe dürefüehre.
Am sächsi isches de losgange mitem Apèro für üsi Ehregescht u die ygladnige Delegatione.
Dank dere wunderbare Sunne hei mir das verusse chönne mache u s’Schwyzerörgeliquartett Lehmann het üs aui uf das Geburtstagsfescht ygstumme.
Am achti isches de mitem offizielle Teu losgange. Mit eme chribbele im Buuch ob ömu de ou aues parat isch u klappet hei mir Bärgbrünneler üses Jubiläum eröffnet. Für dases Abwächslig het gäh, hets üs fescht gfröit, dass mir d’Jodlerfamilie Leuenberger usem Eggiwil u s’Schäferchörli Nordwest hei chönne gwinne, für üses Fescht mit ihrne klangvoue aber ou fine Tön z’umrahme. Mit viu Humor u Witz het dr Michael Jordi alias Sepp Breitemoser düre Obe gfüehrt. Mängs Lache het är üsne Gescht entlockt u es isch e zfridnige, ungerhautsame Obe gsi.
Aus Gründigsmitglied hei mir dr Ruedi Schertenleib dörfe begrüesse, wo de im Feschtakt no viu über die Gründig vo de Bärgbrünneler gwüsst het. Es Johr nachhär isch ou üse Ernst Meier zum Klub gstosse, wo üs glücklecherwys bis hüt aktiv ungerstützt- Danke dir Ärnscht.
Nachem offizielle Fescht isches gmüetlech wytergange, sigs mit gniesse vom Chemibrate, es Bier vom Bierzäut, amene feine Bitz Geburtstagsturte schnouse oder bim Tanzbei schwinge zu de rassige Tön vom SQ Lehmann..
Jo üse 50 Geburtstag wärde mir nid eso schnäu vergässe- schön isches gsi!
Am Sunnti isches de grad wytergange mitem 34. Jodlerträffe vor untere Emme. Wunderschöni Vorträg hei üser Gescht dörfe gniesse. Aune vorah natürli die härzhafte, junge Tön vo üsne Jungjutzerli.
Dürs Programm gfüehrt het üs d’Jocelyne Moser u d’Fabienne Zehnder. Sie heis verstange Spannig i Saau z’bringe u wär weiss, villich hei d’Bärgbrünneler gly zwo Jodlerinne meh i de Reihe!
A dere Steu, es härzlechs Dankeschön a aui Klubs u Gescht für öies derbysi!
S’Wätter hätts nid besser chönne meine mit üs. Bereits am Donnschti vorem Wucheänd isches de los gange mitem zwägmache vor Werkhalle i dr Gartebouschuel im Oeschberg. Näbscht de eigete Lüt si mir uf ganz viu Häng vo usserhaub ahgwyse gsi u dankbar, dass üs so viu ungerstützt hei. Sigs bim Bode inetue, Bühni steue, Bänk u Tische ufsteue, Wäng ychleide, Dekoration vorbereite, Buffet u Zäut ufsteue, Turte bache u schlussändlech bim Mithäufe während em ganze Wucheänd. Ohni öich hätti mir nid es so grosses u wunderbars Fescht chönne dürefüehre-DANKE VIUMOU!
Jo liebi Lüt, itz ghört das grosse Fescht üsere Vergangeheit ah. Danke das dir liebi Gescht so zahurych bi üs sit cho inelose u mitfyre. Mir wärde no lang mit grosser Fröid a üse 50-ischt Geburtstag zrüggluege!